LMP Iloilo President kag Ajuy Mayor Jett Rojas, nagapati nga malinong ang probinsya; mga mayors, wala sang dapat kulbaan

Ajuy, Iloilo–Kabahin sa trabaho sang mga local chief executives ang risgu.

Reaksyon ini ni League of Municipalities of the Philippines Iloilo President kag Ajuy Mayor Jett Rojas sa pagpatay sa duha ka mayors sa Luzon sang nagligad nga semana.

Nagapati si Rojas nga wala sang dapat kulbaan ang mga mayors bangud malinong ang probinsya. Sa pagkamatuod suno sa iya, kalabanan sa mga mayors sa Iloilo ang wala sang bodyguard kon maglakat. Ginpahayag pa ni Rojas nga wala sang mayor sa probinsya nga nakamuno nga may pahamug sa kabuhi.

Samtang gin-athag ni Rojas nga gin-imbitar nila si Chief Supt John Bulalacao sa monthly meeting sang LMP nga hiwaton sa Hulyo 27 bangud luyag sang mga mayors nga ma-istorya ini bilang bag-o nga director sang Police Regional Office 6. Posible nga madala na sa diskusyunan suno kay Rojas ang imbestigasyon sa pagpatay kanday Tanauan, Batangas Mayor Antonio Halili kag General Tinio, Nueva Ecija Mayor Ferdinand Bote. (AGB)