MORE Electric and Power Company, nagpasalig nga masarangan ang power distribution sa siyudad kon ma-aprubahan ang ila franchise

Iloilo City – Ginpasiguro sang presidente sang More Electric and Power Company nga masarangan nila nga mangin power distributor sa siyudad.

Ang MORE ang bag-o nga player kag ka-kumpetensiya sang Panay Electric Company ukon PECO nga naga-apply agud mahatagan sang franchise nga mangin power distributor.

Suno kay Rowell Castro, presidente sang MORE, may capital sila kag mga resources agud mangin power distributor pananglitan aprubahan ang ila prangkisa.

Nagpasalig si Castro nga ma-hire sila sang mga tinawo nga may ikasarang nga mag-manage sang electric facility agud indi ma-kompromiso ang ila serbisyo sa mga kunsumidor.

Nagpahayag man ini nga sila ang mahatag sang kasolbaran sa problema sang mga kunsumidor sa PECO nga gina-ugtasan sang mga taga-syudad. Natural lang suno sa iya nga may kasaypanan ang kompanya apang gilayon man nila ini nga solusyonan agud mahatagan sang maayo nga serbisyo ang mga kunsumidor.

Gin-aku ni Castro nga halin sa Mining industry ang MORE apang subong nangin power distributor.

Sa subong, wala pa sang may na-aprubahan nga prangkisa ang Kongreso agud mangin power distributor sa siyudad. (JoMaque)