(PULSO PULITIKA) Grupo ni Mayor Joe Espinosa, una nga nagfile sa city Comelec samtang grupo ni Cong. Ferj Biron, nagfile sa provincial Comelec
Iloilo–Buwena mano nga nag-file sang ila certificate of candidacy sa una nga adlaw sang filing ang grupo ni Mayor Joe Espinosa kaina sang aga, Oktubre 11.
Gin-updan si Espinosa kag linyada sini sang ila madamo nga mga supporters halin sa misa sa San Jose Church tubtob sa parada kag sa pag-file sini sang COC sa city Comelec office sa Iloilo Terminal Market.
Bitbit ang mga banners kag gin-updan man sang mga drummers, nangin magahod ang mga supporters nga nakasuksok sang blue t-shirts. Nakasuksok naman sang orange t-shirts ang alkalde kag iya linyada.
Nag-file man sang COC sanday anay Councilor Perla Zulueta nga kandidato sang grupo sa pagka-kongresista, Councilor R Leone Gerochi sa pagka-bise alkalde kag mga kandidato sa pagka-konsehal nga sanday Councilors Ed Peñaredondo, Candice Tupas, Liezl Salazar, Mandrie Malabor, Lyndon Acap kag anay Councilor Rodel Agado.
Ginpanindugan naman ni Espinosa nga wala sang may ginpanghatag nga kuwarta sa mga nag-upod nila nga supporters.
“Right timing”
Nagapati si 4th District Congressman Ferj Biron nga husto lang nga timing ang pag-file sang iya grupo sang COC subong nga adlaw agud mahitsu ang tanan nila nga buluhaton.
Si Biron ang mapadalagan nga gobernador samtang running mate sini si incumbent Vice Governor Christine Garin.
Sa 1st district, nag-file sang COC si Congressman Richard Garin nga liwat magapapili kag mga re-electionist board members Renee Valencia kag Val Serag.
Sa 2nd district, magapapili sa idalum ni Biron sanday Pavia Mayor Mike Gorriceta sa pagka-kongresista kag Leon Mayor Rolito Cajilig kag former Leganes Vice Mayor Joseph Allen Españo sa pagka-board member.
Sa 3rd district, magakandidato para board member sanday Pototan SB Member Paolo Guanco kag Atty Francisco Defensor Pesina sang Mina. Wala ginhinambit ni Biron ang kandidato sang grupo sa pagka-congressman sa tersier distrito.
Sa 4th district naman, nag-file sang COC si Barotac Nuevo Mayor Braeden John Biron, bata ni Cong. Biron, para sa pagka-congressman samtang sanday incumbent Board member Domingo Oso kag former Mayor Rolly Distura sang Dumangas ang sa pagka-board member.
Sa 5th district, kandidato sa pagka-congressman si Congressman Boboy Tupas kag sa pagka-board member sanday Dr. Darl Tupas kag Ajuy SB Member Carol-V Espinosa. (AGB)