Mga kandidato sa pagka-bise gobernador, nagsabat sa mga pamangkot sang mga panelista kag audience sa ika-5 nga hugnat sang Candidates’ Forum sang Aksyon Radyo kag UPV

Iloilo City — Nangin madinalag-on ang ika-lima nga hugnat sang Candidates’ Forum sang Aksyon Radyo Iloilo kag University of the Philippines Visayas nga gintambungan sang magkasumpong sa pagka-vice governor sa Iloilo kahapon, Abril 5.

Ginplastar nanday incumbent Vice Governor Christine Garin kag Barotac Viejo Mayor Niel “Beng’ Tupas III ang ila plataporma kag mga plano para sa probinsiya nga maka-benepisyo ang mga pumuluyo.

Isa-isa man nila nga ginsabat ang mga pamangkot sang mga panelista kag mga audience.

Nagpanindugan si Tupas nga preparado siya nga nagsulod sa pulitika. Gin-athag niya nga indi sang aksidente ang pagpadalagan niya bilang bise gobernador.

Nagpahayag ang alkalde nga kon indi niya malapawan ang pag-serbisyo sang iya amay nga si the late former Governor Niel Tupas kag mga kauturan, iya man ini nga tupungan.

Luyag naman nga padayunon ni Garin ang iya gin-suguran nga pagserbisyo sa probinsiya.

Suno kay Garin bisan natapos na ang election, wala siya nag-untat sa paglibot sa probinsiya agud hibaluon ang sitwasyon sang mga pumuluyo.

Nagpabutiyag ang bise gobernador nga luyag niya lang ibalik sa mga pumuluyo ang suporta kag pagsalig nga ginhatag sa iya.

Una nga nagpabutiyag ang bise gobernador nga indi siya magpadalagan pero nagbaylo ang iya pinsar. (JoMaque)