Market-in-Charge sa Iloilo Terminal Market, wala sang ideya sa ginpahayag ni Mayor Joe Espinosa nga extortion sa mga vendors

Iloilo City – Gin-ako ni Lea Salvo, market-in-charge sa Iloilo Terminal Market nga wala siya nakahibalo nga may extortion nga nagakatabu sa mga vendors.

Pa-athag ni Salvo, Nobyembre 12 sang nagligad nga tuig lang siya na-assign sa Terminal Market.

Suno kay Salvo, nahibaluan niya lang ang impormasyon sang nag-tenir si Mayor Joe Espinosa sa merkado sang damlag lang kag nagreklamo ang mga vendors.

Base sa ginpalab-ut nga reklamo sa alkalde, ginasukot ang mga vendors sang P50 sa lamesa, P10 sa trapal kag P15 sa suga kada adlaw kag indi ini sanctioned sang syudad.

Ginhingadlan man ni Espinosa sanday Punong Barangay Alain Rey Depatillo sang Rizal Pala-Pala 1 kag Punong Barangay Noel Soliman sang Rizal Pala-Pala 2 nga nagapanukot sa mga fish vendors. Nanginwala si Soliman nga nagapanukot siya sa mga vendors samtang gin-athag ni Depatillo nga walo ka lamesa lang ang iya ginapahulam kag wala siya nagapanukot, kundi ang mga vendors ang nagatanyag sa iya sang P30.

Hulaton ni Salvo ang instruction ni Local Economic Enterprise Office (LEEO) head Ariel Castañeda angut sa mga reklamo.

Ginpabutyag ni Castañeda nga gina-imbestigaran nila ang reklamo kag kon mahibaluan nga kulang ang mga lamesa sa merkado, magadugang ang LEEO. (JoMaque)