Iloilo City — Nagreklamo ang 32 anyos nga Ilonggo OFW nga ginkuha sang iya asawa ang ila pito ka tuig nga bata nga babaye matapos nagbiya ang babaye sa ila balay sang Mayo 19.

Nagdangup sa Aksyon Radyo Iloilo si alyas Nonoy agud magpangayo sang bulig sa pagpangita sa iya asawa kag ila bata.

Suno kay Nonoy, nag-umpisa ang problema sang nagtrabaho siya sa abroad kag nakabaton sang mga istorya nga may iban nga lalaki ang iya asawa nga si alyas Inday.

May nakalab-ot man nga impormasyon kay Nonoy nga gab-i ukon kaagahon na nagapauli si Inday halin sa pag-inom inom upod sa iya mga abyan kag ginapatihan karelasyon nga lalaki.

May tiun man suno kay Nonoy nga ginapa-upod ni Inday sa pag-inom inom ang ila bata kag ginapa-angkas pa sa motorsiklo nga wala sang ginasoksok nga helmet.

Nagapati man si Nonoy nga nagagamit sang illegal drugs si Inday sugod sang nagka-relasyon siya sa iban nga lalaki.

MASUBO NGA BIRTHDAY

Mayo 19 sang kaagahon, birthday ni Nonoy, sang nagdesisyon siya nga magpauli kag tuyo sorpresahon kuntani ang iya mag-iloy kag pangayuan man sang kaathagan ang iya asawa angut sa nabaton niya nga mga istorya.

Pero nakibot si Nonoy nga sa baylo nga sug-alawon sang halok kag kupo sang iya asawa, una pa nga gindakup ni Inday ang iya cellphone, ginsulod sa bag kag ginhulid sa pagtulog.

Suno kay Nonoy, nagbalik sa pagtulog ang iya asawa samtang nagapungko siya sa kilid sang hiligdaan kag nagatulok sang masinulub-on sa iya mag-iloy tubtub wala na siya matulugan.

Sang amu man nga adlaw, naglakat si Inday upod ang ila bata sang nakita nga naguwa si Nonoy sa ila balay.

HANDA NGA BATUNON

Handa naman si Nonoy nga batunon kag pasensyahon ang sala sang iya asawa para na lang sa ila bata.

Suno kay Nonoy, nagtanyag pa siya kay Inday nga makadtu sila sa abroad, kalimtan ang natabu sa ila pamilya kag magsugod sang bag-o nga kabuhi.

Nabalaka naman si Nonoy sa sitwasyon subong sang iya bata nga gindala sang iya asawa ilabe na nga malapit na lang mag-abre klase.

REAKSYON SANG AMAY NI INDAY

Naga-apelar ang amay ni Inday nga ipakita lang sa ila ang bata kun indi na siya magbalik sa iya bana.

Nagakahangawa man si alyas Roger sa sitwasyon sang iya apo bangud gindala sang iya iloy nga wala man lang sang balon nga mga bayo.

Suno kay Roger, gin-block man siya sang iya bata bangud indi magbaton sang laygay halin sa ila pamilya.

Nagapati si Roger nga naga-entra sa bisyo ang iya bata base man sa sugid sang iya mga abyan pero iya lang ginahipsan agud indi magla-in ang buot sang ugangan sang iya bata samtang wala pa nakaabot ang iya umagad.

Natukiban ni Roger ang ginahimo sang iya bata sugod sang naga-away-away ang mag-asawa sang ginbisita niya ang iya apo tatlo ka bulan na ang nakaligad.

Mas luyag ni Roger nga ihatag sa amay ang iya apo agud mahatagan sang maayo nga buwas damlag sang iya umagad. (AGB/JGM)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply