4 ka tuig nga bata nga lalaki, patay sa sunog sa Rizal, Lapuz

Lapuz, Iloilo City — Patay ang apat ka tuig nga bata nga lalaki matapos na-trap sa nasunog nga balay sa Rizal, Lapuz kagab-i, Hunyo 11.

Suno kay Benedict, amay sang bata, nga nagapalagyo sila halin sa nasunog nga balay pero nagbalik pasulod ang bata kag wala na nakaguwa.

Base sa report, ginbalikan sang bata ang iya ido nga nabilin sa balay.

Wala na nahingagaw salbar sang pamilya ang bata kag sunog na nga nakit-an malapit sa comfort room sang ila balay upod ang iya ido.

Isa pa sa anggulo nga ginalantaw nga posible namurag-muragan ang bata kag nagbalik sa balay sa balay nga nagakasunog. Ginpahayag nga nagakatulog ang bata kag mga utod niya kag ginpukaw lang sang ila ginikanan sang nag-ibwal ang kalayo.

Ginpahayag sang bombero nga halos indi na makilala ang bata sang nakit-an.

Ginapatihan ni Punong Barangay Allona sang Rizal nga kandila ang ginhalinan sang sunog.

Ginpahayag nga madugay na nga wala sang elektrisidad ang ginateniran nga balay sang pamilya sang bata. (JoMaque)