By: JoMaque | June 2, 2020

Igbaras, Iloilo – Nagaproblema ang Local Government Unit (LGU) sang Igbaras kasunod sang pag-positibo sa COVID-19 sang 55-anyos nga lalaki halin sa ila banwa.

Ginkumpirmar ni Igbaras Mayor Jaime Esmeralda nga ‘involved sa LGU’ si WV 114.

Suno kay Esmeralda, katapusan nga nagbiyahe ang pasyente sang Mayo 1 sang nagtambong sa birthday party sa Iloilo City. Halos wala man nagalagaw sa ila banwa ang pasyente, dugang pa sang alkalde.

Gin-ako ni Esmeralda nga palaligban sa ila kun paano na-infect ang pasyente bangud isa ka bulan na ang nakaligad sang siya ang nagbyahe.

Ginatan-aw man nga posibilidad ni Esmeralda nga may nagalagaw nga COVID-19 positive sa ila banwa pero asymptomatic, pero nagalaum nga indi ini ang sitwasyon bangud istrikto sa border restriction sang napa-idalum pa ang probinsya sa enhanced community quarantine.

“PAANO NA-TEST ANG PASYENTE”

Mayo 27, sang naka-schedule nga magpa-RT-PCR test si Esmeralda kag sang nahibaluan ini sang pasyente, nag-ayo siya kun pwede makaupod.

Ang pagpaidalom sa ila sa test ang inisyatibo ni Iloilo 1st District Rep. Janette Garin, suno kay Esmeralda.

Maayo lang suno sa alkalde nga may nagtanyag sang slot sa pasyente rason nga napaidalom man siya sa test. Ginkumpirmar ni Esmeralda nga naka-upod sila sang pasyente pa-test sa Rural Health Unit.

Asymptomatic suno sa iya ang pasyente ukon wala nakitaan sang sintomas sang COVID-19.

Ginpahayag pa sang alkalde nga kumplikado ang ila kaso sa banwa bangud madamo sang nagka-contact sa pasyente.

Nagaplano ang LGU nga ipaidalom sa una nga test ang 100 ka mga nagka-contact sa pasyente kag kun mag-negatibo ang resulta, ipatuman ang ‘working PUMs’ kag limitado lang nga serbisyo ang mahatag sang banwa.

Temporaryo nga mauntat ang serbisyo sang RHU, SB Office kag Mayor’s Office samtang ginahimo ang contact tracing kag ma-test ang mga nagka-contact sa pasyente.

Nagpangabay man sang paghangop ang alkalde sa ila mga pumuluyo, kag naghingyo nga indi pag-i-discriminate ang nagpositibo.

Naka-quarantine na subong ang pasyente, lakip ang iya pamilya. | Via Firingline

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply