Military truck sang Philippine Army, ginpalukpan sang ginapatihan NPA members sa Hamtic, Antique; 1 suldado, nadaplisan sa kilay

By: JoMaque | July 3, 2020

Antique –Ginpalukpan sang ginapatihan New People’s Army (NPA) members ang military truck nga ginsakyan sang tropa sang gobyerno sa Barangay Igbucagay, Hamtic, Antique, pasado las-12 kaina sang kaagahon.

Ginkumpirmar ini ni Lt. Colonel Joel Benedict Batara, commanding officer sang 61st Infantry Battalion sang Philippine Army.

Suno kay Batara, padulong sa Tiolas, San Joaquin ang tropa sang ginpalukpan sa Igbucagay. Maga-augment ang militar sa border control point sang San Joaquin Iloilo kag Antique.

Ginpahayag niya nga una may ginpalupok nga improvised explosive device (IED) ang NPA kag ginsundan sang duha tubtob tatlo ka lupok halin sa mataas nga lugar.

Nagbalos palupok ang tropa kag pagkatapos sang duha ka minutos, wala na sila sang nabatian nga lupok.

Ginkumpirmar man ni Batara nga may tropa nga nadaplisan sa kilay nga naga-ranggo sang Private First Class pero gilayon man siya nga gindapatan sang pagbulong. | via Aksyon Hotline