Labing una nga indigenous case ukon local case sang COVID-19, na-record sa janiuay -DOH 6

By: JoMaque | July 29, 2020

Janiuay, Iloilo – Na-record sa Janiuay ang labing una nga indigenous case ukon local case sang COVID-19.

Base sa health bulletin sang Department of Health 6 kahapon, Hulyo 27, lakip sa 49 nga nagpositibo ang 45 anyos nga babaye nga taga Janiuay.

Gin-classify siya kay WV1115 kag indi Locally Stranded Individual, Overseas Filipino Worker, ukon Authorized Person Outside of Residence.

Ang indigenous ukon local case amo ang mga pasyente nga natapikan sang kagaw sa locality.

Suno kay Janiuay Mayor Bienvenido Margarico, medical technologist sa ospital sa syudad si WV1115 nga asymptomatic ukon wala sang sintomas sang COVID-19.

Gin-athag ni Margarico nga wala sang local transmission sa subong sang COVID-19 sa ila banwa.

Direct contact si WV1115 sang iya upod sa trabaho nga una na nagpositibo sa COVID-19.

Wala ginhingadlan sang alkalde ang semi-private kag semi-public hospital nga gina-obrahan sang nagpositibo.

Hulyo 24 sang gin-swab si WV1115 kag naga-quarantine siya tubtob nga naguwa ang resulta kahapon(Hulyo27).

Nakapauli sa Janiuay halin sa syudad si WV1115 sakay sa depasahero nga jeep.

Gin-isolate sa ila balay si WV1115 samtang gin-quarantine man ang iya utod nga upod niya sa balay. | via Aksyon Aljohn Torreta

Ginpabantayan sang alkalde ang balay sang nagpositibo kag ginpaseraduhan man temporaryo ang ila tyangge.

Nagapadayon ang contact tracing sang Municipal Health Office sang Janiuay.

Magluwas kay WV1115, may tatlo man ka mga LSIs LSIs nagpositibo sa COVID-19 sa Janiuay.