By: JoMaque | Oktubre 7, 2020

ILOILO – Padayon ang pagtrabaho sang Globe Telecommunications agud mapaayo ang ila signal, ilabe pa nga nagsugod na ang online classes sang mga estudyante.

Suno kay Mr. Patrick Gloria, External Affairs Officer sang Globe Telecom for Visayas and Mindanao, tatlo ka proyekto ang ila ginatutukan subong para mapaayo ang ila serbisyo.

Una diri ang pag-upgrade sang mga existing cellsites kag ginadugangan ang mga equipment agud madamo nga customers ang ila ma-akomodar kag mapadasig ang signal.

Nagapatindog man sila sang dugang nga mga cellsites. Gin-ako ni Gloria nga tatlo tubtob apat pa ka bulan ang kinahanglan agud matapos ang mga ini.

Magluwas diri, nagpangtakod man sila sang madamo nga new fiber to the homes sa nagkalain-lain nga lugar. Sa pagkamatuod suno sa iya, linibo nga linya sang fiber sa siyudad kag probinsiya sang Iloilo ang ginpangtakod.

Naga-coodinate man sila sa Iloilo City Government agud mabutangan sang WiFi connectivity ang kada barangay sa siyudad para makabulig sa mga estudyante kag iban pa nga residente.

Dululungan, suno sa iya, ginahimo ang proyekto kag nagalaum sila nga madasig matapos agud mapuslan gilayon sang mga residente.

Gintinguhaan man sang Aksyon Radyo Iloilo nga makuhaan sang statement ang SMART kag PLDT may kaangtanan sa ila mga lihok pero wala pa naghatag. | Via Firingline

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply