DOH 6, mas mangin agresibo sa kampanya batok sa COVID-19 kasunod sang survey nga kadam-an sang mga pumuluyo sa siyudad sang Iloilo ang nagapati nga indi sila madali matapikan sang virus
By: JoMaque | Nobyembre 10, 2020
Iloilo City – Mas mangin agresibo ang Department of Health 6 sa ila kampanya batuk sa COVID-19 suno kay Dr. Jessie Glenn Alonsabe, regional epidemiologist sang nasambit nga ahensiya.
Kasunod ini sang survey nga kadam-an sa mga Ilonggos ang nagapati nga indi sila madali nga matapikan sang COVID-19.
Suno kay Dr. Alonsabe, mas pasangkaron nila ang information dissemination sa ila social media kag paagi man sa partnership sa nagkalain-lain nga mga media outlets.
Gin-athag ni Dr. Alonsabe nga vulnerable ukon mahimo matapikan sang COVID-19 ang tanan.
Kun indi gilayon makoreheran ang ini nga sala nga pagpati, magaresulta ini suno sa iya sang mataas gihapon nga kaso sang COVID-19.
As of November 8 nga data sang DOH6, naglab-ut na sa 17,721 kaso sang COVID-19 ang na-record sa Western Visayas.
Ikatatlo ang siyudad sang Iloilo sa may pinakamadamo nga kaso nga naglab-ut sa 4,141. | via Aksyon Aljohn Torreta