By: JoMaque | Nobyembre 25, 2020

ILOILO CITY – – Magahimo sang COVID-19 random testing ang Iloilo City Government sa mga national government agencies, ilabe pa ang mga masaku kag madamo sang naga-transaksyon.

Suno kay Iloilo City COVID Taskforce spokesperson Jeck Conlu, posible masulat ang syudad sa mga NGAs, ukon mapaguwa si Mayor Jerry Treñas sang executive order para sa random testing sa tuyo nga masiguro nga safe ang mga opisina sa syudad.

Mas madasig, suno kay Conlu, ang paghimo sang random testing bangud naga-operate na ang Uswag Molecular Laboratory sang syudad sa San Pedro, Molo.

Sa una nga bulan sang operasyon, prayoridad sa lab ang mga ma-identify sang contact tracing team nga may close contact sa nagpositibo; ang mga nagapa-swab sa Jubillee Hall kada Biernes pareho sang mga nagabusong, may comorbidities kag gina-dialysis; mga gina-refer sang mga doktor sa health centers sang kada distrito kag ang mga nagatrabaho sa City Government kag frontliners, kag libre ang pagpa-test.

Indi pa makabaton sang walk-in clients ukon gin-refer sang private hospitals kag private clinics, suno kay Conlu.

Samtang, iga-lockdown naman sang 14 ka adlaw ang magbalibad sa pagpa-test, dugang ni Conlu.

Pwede man makarekomendar ang COVID Taskforce sang lockdown kun kinahanglan nga mag-disinfect.

Leave a Reply