4 mangingisda, na-rescue sang nabalian sang tarik ang ila sakayan sa baybayon nga sakop sang Oton kag Tigbauan

Iloilo — Na-rescue sang barko sang Starlite Venus ang apat ka mangingisda sang nabalian sang tarik ang ila sakayan sa baybayon nga sakop sang Oton kag Tigbauan kaina sang kaagahon.

Suno kay Commander Edison Diaz sang Philippine Coast Guard-Iloilo, nakabaton sila sang impormasyon kagab-i gani gilayon sila nga nag-deploy sang rescue team sa lugar agud magpangita sa mga mangingisda.

Ginpahayag ni Diaz nga mabaskog ang hangin, dalagko ang balod kag madulom ang lugar gani wala makita sang rescue team ang mga mangingisda.

Natabuan naman suno sa iya nga nagalayag pakadto sa Iloilo City ang barko sang Starlite Venus halin sa Batangas gani ginpangayuan nila sang bulig.

Nakita sang barko ang apat ka mga mangingisda sa lawod nga nagapangayo sang bulig rason nga ila gin-rescue gilayon kag gin-turnover sa PCG kaina sang kaagahon.

Yara na sa maayo nga kahimtangan ang mga mangingisda suno kay Diaz kag ginkuhaan na lang sang dugang nga detalye sa natabo. | via AM Reports