Iloilo — Naupos ang balay kag boarding house sang nasunog sa R. Armada Street, Poblacion, Janiuay mga pasado las-4 kahapon sang hapon, Abril 30.

Suno kay Sean Frigillano nga lakip sa nasunogan, naghalin ang kalayo sa kwarto sang iya lola nga si Norma Agabe.Daku ang ila pagpati nga halin sa natumba nga kandila ang kalayo bangud nagapangamuyo si Agabe antes nagluntad ang sunog.

Madasig nga naglapta ang kalayo suno kay Frigillano bangud human sa light materials ang balay tubtob naglapta pa gid sa boarding house.

Wala sang may nasalbar nga gamit si Agabe lakip na ang mga boarders kag gamay lang ang nasalbar nga gamit sang pamilya ni Frigillano.

Wala sang may napilasan sa insidente.Temporaryo nga nagtiner sa barangay hall ang mga nasunogan.

“IMBESTIGASYON SANG BFP-JANIUAY”

Duha ka anggulo ang gina-imbestigaran sang Bureau of Fire Protection- Janiuay sa nagluntad nga sunog. Suno kay Senior Fire Officer 4 Ariel Soliterio sang BFP- Janiuay, lakip sa gina-imbestigaran nga ginhalinan sang kalayo ang kandila kag electrical connection.

Naghalin suno sa iya ang kalayo sa kwarto nga gina-ukopar sang senior citizen nga si Norma Agabe antes naglapta sa bug-os nga balay lakip na sa boarding house.

Madasig nga nagdaku ang kalayo, suno kay Soliterio, rason nga nagpangayu sang bulig ang BFP- Janiuay sa BFP Calinog, Maasin, Lambunao, Mina, kag Cabatuan.

Ginabanta P67, 250 ang kahalitan sang sunog sa struktura kag wala pa madala ang mga gamit nga lakip man sa naupos.Gin-deklarar nga fireout ang sunog mga las-6:10 sang gab-i. — via Farrah Mae Morano

By Jo Gelloagan-Maque

Aksyon Radyo-Iloilo is located at Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply