10 essential workers sa Western Visayas nga nalakip sa A4 priority list, ginbakunahan sa kick off sang vaccination para sa amo nga sector kahapon, Mayo 1

ILOILO CITY — Ginhimo subong nga adlaw ang symbolic vaccination ukon kick off sang pagpangbakuna para sa group A4 base sa priority list sang COVID-19 vaccination program sang gobyerno kadungan sang Labor Day sa Western Visayas.

10 ka mga yara sa group A4 ukon ang mga economic frontliners kag essential workers ang ginpangbakunahan gamit ang Sinovac COVID-19 vaccine. Ginhimo ang vaccination sa Iloilo St. Paul’s Hospital.

Suno kay Dr. Mary Jane Juanico, spokesperson sang Department of Health 6, importante nga maproteksyunan man ang mga economic frontliners kag mga essential workers bangud adlaw-adlaw man sila nga naga-atubang sa mga tawo kag kinahanglan gid sila agud mabatak liwat ang ekonomiya.

Pila sa mga ginpangbakunahan ang mga security guards, mga abogado, kag mga vendors. Wala man sang na-record nga adverse effect ang DOH6 sa mga ginpangbakunahan. — via FiringLine