Bag-o ginbun-ag nga lapsag, nasapwan nga patay sa sulod sang cabinet; Pulis, nagapati nga ginpatay sang iloy ang bata bangud napatay ini sa kuga base sa post-mortem examination

Capiz — Patay na sang nasapwan ang bag-o ginbun-ag nga lapsag sa sulod sang cabinet sa Barangay Baybay, Roxas City sang Setyembre 17.

Nasulod sa eco bag ang lapsag nga nagabug-at sang tatlo ka kilo kag naputos sang tela sang nakit-an.

Suno kay Police Master Sergeant Ronie Recto, imbestigador sang Roxas City Police Station, ang iloy sang lapsag ang nagsulod sa iya bata sa cabinet sa balay sang iya amo.

Nasapwan ang lapsag sang may nakita nga dugo sa bayo nga ginhaboy sa basurahan.

Nagsulod bilang caregiver si alyas Lyn sa prominente nga pamilya sang Abril 2021 kag ginapatihan sang police nga nagabusong na siya sadto sang apat ka bulan kag tunga.

Una diri, makapila ka beses nga nagmuno ang amo kag ama kay Lyn kun nagabusong siya bangud nagadako ang iya tiyan apang ginpanginwala niya.

Pero lipod sa ihibalo sang amo kag ama, nagbata siya sang Setyembre 17 sang aga.

Gindala pa si Lyn sa ospital bangud naglain ang pamatyag pero wala pa gihapon nakabalo ang iya amo nga nagbata siya.

Gin-pregnancy test si Lyn kag positibo ang resulta.

Pero sang gin-ultrasound, nakibot ang doktor kag iya amo kag ama nga wala sang bata sa tiyan ni Lyn.

Ginpanginwala gihapon ni Lyn nga nagabusong siya tubtob nagpauli na sa balay sang amo.

Las 10:00 sang gab-i sang amo nga adlaw, natingala ang iban nga kabulig sa balay nga may ginahimos si Lyn bisan indi iya obligasyon ang pagpaninlo sa balay.

Gin-check sang mga kaupdanan niya ang basurahan kag may nakita nga bilog-bilog nga dugo tubtob ginpangita ang isa ka eco bag nga missing sa kusina nga nakit-an sa kwarto sang amo.

May nakit-an pa gid nga tinulo sang dugo sa salog kag sang ulihi nakita ang eco bag sa sulod sang cabinet nga ang unod amo ang patay nga lapsag nga lalaki.

Base sa resulta sang post mortem examination, napatay sa kuga ang lapsag. l via Night Patrol